nno salutis fünfftzehenhundert unnd im XXV. jar am dinstag nechst nach Trinitatis oder am 13. tag des brachmonats (13. Juni) zwischen 3 unnd 4 oren nach mittag hatt mir der herre den ersten sune geben mit namen Theophilus; sein dott (Taufpate) Martinus Meglin, der zeyt pfarrer zu Kitzingen.
Hernach im 1526. hatt mir der herre nach seynem göttlichen willenn gedachtenn meynenn liebenn sun Theophilum widerumb auß dieser welt genommen am 26. tag des Mayenn. Des Herren name sey ewiglich gebenedeyet, Amen; dann er ists, der da gibt und widerumb nymbt etc ...
Nach Christus gepurt tausent fünffhundert und im sechsunndzweyntzigisten jar am abend Symonis unnd Jude der heyligen zwelffbotten oder an dem 27. Octobris des weynmonats zwischen 2 unnd 3 horen nach mittag hatt mir der herre den anndern sune gebenn mit namen Christophilus auch zu Kitzingen. Dem herrenn sey derhalb lob, dannck, ehr und preyß durch seynen aynigenn sun Christum unnsern herren in ewigkayt, Amen ...
Am dreyzehenden tag Junii brachmonats früe zwischen 5 unnd 6 horen hat mir gott der herr den dritten son mit namen Johannes gebenn; dem herrenn sey derhalben lob und dannck in ewigkait, Amen; anno salvatoris 1528.
An eynem sambstag nach Corporis Christi vel 13. die mensis Junii 1528 natus; item am 4. tag des weinmonats (4. Oktober) ist jetztgesagter mein lieber sun Johannes wiederumb aus diser Welt geschieden, war bey anderthalb jar alt, 1529; obiit infra 2 et 3 post meridiem Kitzingae (er starb zwischen 2 und 3 nachmittags zu Kitzingen).
Item zwischen 2 unnd 3 nach mittag am 25. tag Septembris gab mir gott den vierten sun mit nomen Hieronymum, welcher auch denselben abend nach gottes willenn verschiede anno 1529. Inn diesem 29. jar ümb Bartholomei (24. August) gewunen vil kinder an allen orten die durchschlahenn unnd rotten flecken (Pocken), auch alte leut. Und gieng dise kinds kranckheit weydlich imm schwanngk, starben vil kinder daran gewunnens meine zwey kindlich, der Christophilus und Johannes, alle bede durchschlagen und rotten flecken 1529 ...
Item 1530 am ersten tag des Weynmonats (1. Oktober) an einem sambstag früe zwischen 1 unnd 2 gab mir gott den fünnften son mit namen Jheronymus; welchen der ersam Jheronymus Kumpff, der zeit ein liebhaber des heyligen evangelii unnd burger zu Kitzingen, aus der tauff hube. Dem herren sey derhalben lob, ehr und danck in ewigkeit, Amen. Discessit rursus (er starb wieder) 15. Aprilis 1532 ...